شهادات التغذية للصيادلة

دي تجميعة مركزة لأهم شهادات التغذية اللي ممكن يحصل عليها الصيادلة للتخصص في المجال ده:

أولا: البورد الأمريكي للتخصصات الصيدلانية:

Board of Pharmacy Specialties: "BCNSP" Board Certified Nutrition Support Pharmacist

• أهميتها المهنية: تقدر تسجل بيها أخصائي تغذية في النقابة العامة للصيادلة بس بشرط: تطلع قرار المعادلة بتاعها.

• قرار المعادلة: الشهادة بعد ما تاخدها تقدر تطلع لها قرار معادلة من المجلس الأعلى للجامعات مكتوب فيه: تعادل ماحستير بشرط عمل رسالة وده اللي بتسجل بيه أخصائي (انظر تحديثات نظام معادلة البورد هنا).

• الأهمية العلمية: علشان تمتحن الشهادة انت بتدرس أكتر منهج شامل للتغذية اللي حطاه الجمعية الأمريكية للتغذية المعوية والوريدية "الأسبين" وده أقوى تأسيس علمي ممكن تاخده في المجال.

• يشترط مرور 3 سنين من تاريخ ترخيص مزاولة المهنة قبل الامتحان.

• رسوم الامتحان 600 دولار.

• الامتحان بيتم عقده في مقرات امتحانات البرومترك.

• تقدر تمتحن مرتين في السنة إما دور أبريل-مايو أو دور سبتمبر-أكتوبر.

• البورد الفرق الأساسي بينه وبين الشهادات الأكاديمية العادية إنه إثبات على إنك ملتزم بالتعليم المستمر، علشان كدة الشهادة لها تاريخ صلاحية 7 سنين، ولازم تجددها بخوض امتحان تجديد مخفض ب400 دولار في نهاية المدة أو خلال ال7 سنين بتعمل ساعات تعليم مستمر بشروط معينة علشان تجدد لك الشهادة تلقائيا.

ثانيا: البورد الأمريكي للتغذية المعوية والوريدية "الأسبين":

American Society of Parenteral & Enteral Nutrition "ASPEN": Certified Nutrition Support Clinician "CNSC"

• هو نفسه اللي حاطط منهج للتأهيل لامتحان بورد الصيادلة، فنفس المنهج يؤهل لشهادة بورد هو بيديها.

• الامتحان بيتم عقده في مقرات امتحانات البرومترك (تحديث: بفضل كورونا أصبح متاح الامتحان عن بعد في المنزل!).

• الفرق الأول بينه وبين بورد الصيادلة: لا يشترط مرور 3 سنين من التخرج، يعني يقدر حديث التخرج يمتحنه.

• الفرق التاني: إن الامتحان يقدر يمتحنه الأطباء والتمريض واللي معاهم بكالوريوس تغذية وكمان الصيادلة.

• الفرق التالت: التكلفة 430 دولار هي رسوم التسجيل للامتحان.

• الفرق الرابع: الامتحان الدولي خارج أمريكا متاح مرة واحدة في السنة في مارس والتسجيل من ديسمبر إلى نص فبراير (تحديث: بفضل كورونا أصبح متاح مرتين في السنة).

• الفرق الخامس: التجديد كل 5 سنين بإعادة الامتحان بنفس الرسوم.

انظر هنا تفاصيل البرنامج التدريبي المؤهل لبورد الBPS ولبورد الASPEN

ثالثا: الشهادة المهنية في التغذية الإكلينيكية:

Nutrition Support Certificate: Accredited by ASHP and ASPEN

• لا تشترط سنوات خبرة.

• انت بتحجز الكورس الأونلاين واللي في نهايته امتحان الشهادة، عكس الشهادتين السابقتين اللي بتحجز امتحان فقط، لكن إما بتدرس مع نفسك أو تاخد كورس مؤهل ليهم.

• التكلفة: 545 دولار

• دي شهادة مهنية متنهية: يعني ملهاش تجديد زي البورد.

• كانت معتمدة من الأسبن ثم تم إلغاء الاعتماد.

• لا ننصح بها لأن تكلفتها قريبة من تكلفة البورد وهي مجرد شهادة تدريب أونلاين، والبورد أفضل منها بكثير.

رابعا: شهادة المركز الاستراتيجي للتعليم المهني للسمنة "سكوب":

Strategic Center for Obesity Professional Education "SCOPE"

• دي تعتبر الشهادة المهنية الوحيدة الدولية المعتمدة في مجال السمنة والنحافة.

• بيتقال عليه بالغلط البورد البريطاني في السمنة والنحافة بس هو وإن كان ماشي بنظام البورد في الإلزام بالتعليم المستمر لكن مفيش في تسميته كلمة بورد.

• متطلبات الحصول عليها: تخلص كورس مدفوع أونلاين على موقع "سكوب" + تخلص كورسات مجانية اختيارية أونلاين على نفس الموقع + امتحان نهائي على الموقع + تقدم شهادة شهادة خبرة 6 شهور فأكثر في مجال السمنة والنحافة.

• الرسوم: 90 استرليني، لكن لو أرسلت إيميل لسكوب قبل التسجيل فيه صورة جواز سفرك المصري أو البطاقة الشخصية بالعربي بدون ترجمة، وتطلب كود التخفيض، بيبعتوا لك كود خصم يخلي الرسوم 45 استرليني.

• الشهادة صلاحيتها سنة، وعلشان تجددها لازم تلتزم بالحد الأدنى للتعليم المستمر وهو: دراسة 2 موديول جداد كل سنة على موقع سكوب، ورسوم التجديد 12 إسترليني سنويا.

• انظر هنا تفاصيل البرنامج التدريبي الذي نقدمه في السمنة والنحافة والذي يتضمن منهج سكوب.

خامسا: دبلومات كليات الصيدلة في مصر:

• صيدلة المنصورة بتقدم دبلوم في التغذية الإكلينيكية وكذلك صيدلة القاهرة وطنطا وأسيوط.

• ميزة الدبلومات: تقدر تسجل أخصائي تغذية في النقابة العامة للصيادلة بيها، وشهادة أخصائي النقابة العامة هي مجرد شهادة شرفية، غير معترف بيها من وزارة الصحة ولا أي جهة تصنيف مهني عربية أو أجنبية.

• عيوب الدبلومات من وجهة نظرنا كتير جدا والبورد أفضل منها، وده رأينا المتحيز وغير المحايد:

1. التكلفة المباشرة المرتفعة: الرسوم بتتراوح بين 12000ج إلى 30000ج.

2. التكلفة غير المباشرة المرتفعة: زي تكلفة الانتقالات للحضور، وتكلفة الحاجة للتفرغ من العمل للالتزام بالحضور والغياب.

3.  هي مصنفة في وزارة الصحة أنها درجة أقل من البورد.

4. المحاضرين غالبا أكاديميين وغير ممارسين.

5. وجود شروط قد لا تلائم الكثير مثل: التقدير، والتفرغ، والموقف من التكليف، والالتزام بالحضور والغياب.

6. الجهة اللي بتدي دبلوم وعايزة تدي مصداقية منهم هتلاقيها بتتفاخر إنها بتشرح العديد من أجزاء المنهج من منهج البورد!!

سادسا: شهادات أخرى:

• شهادات التغذية الرياضية: كثيرة ومتنوعة وكلها تقدر تاخدها بكورسات أونلاين باكيدج واحدة: الكورس + الشهادة.

انظر هنا تفاصيل البرنامج التدريبي المؤهل لشهادة ISSA في التغذية الرياضية

• شهادة الجامعة الأمريكية بالقاهرة AUC: شهادة مهنية تكلفتها عالية جدا مقارنة بكل الشهادات السابقة وغير معترف بيها لا في وزارة الصحة ولا النقابة.

• شهادة أكاديمية السادات للعلوم الإدارية: أديك قلت! للعلوم الإدارية... رايح تاخد منها شهادة في التغذية ليه؟! معترف بيها فين؟!

• شهادات الدبلومات من سناتر أونلاين: موضوع شائك خلينا نقول خلاصته في كلمة واحدة: بلاش!

• شهادات في التغذية من كليات غير صيدلة: دي دبلومات وشهادات في التغذية العامة مش الإكلينيكية، أو في صناعات الأغذية، وغير معترف بيها لا في وزارة الصحة ولا النقابة العامة.

بعد لستة الشهادات دي كلها... خلينا نسأل السؤال المهم... إيه مجالات العمل المتاحة للصيادلة في التغذية؟

1. العمل في مجال السمنة والنحافة، ومن الآخر غير مسموح لك كصيدلي بفتح عيادة مهما كان معاك من مؤهلات، لكن تقدر تشتغل استشارات تغذية في العيادات الخارجية للمستشفيات العامة والخاصة والبولي-كلينكس الخاصة، وكمان تقدر تدي استشارات أونلاين سواء على صفحتك أو موقعك الخاص، أو من خلال مواقع استشارات طبية بتسجل فيها كإخصائي وتستقبل الاستشارات من خلالهم.

2. كتابة محتوى تسويقي لشركات المكملات الغذائية داخل مصر، أو خارج مصر من خلال سيستم أونلاين.

3. العمل كاستشاري تغذية لشركات المكملات الغذائية أو حتى شركات الأغذية العادية، ويكون دورك تقديم استشارات ومحاضرات توعية مباشرة أو تليفونيا أو أونلاين عن منتجاتهم.

4. العمل في مجال التغذية الرياضية في الأندية والجيمات.

5. العمل كميديكال أدفايزور في شركات الأغذية العلاجية.

6. العمل في شركات أجهزة وآلات تحضير الأغذية الوريدية.

7. العمل كصيدلي تغذية أو إخصائي تغذية إكلينيكية في المستشفيات، وتكون مسؤوليتك إنشاء والقيام بأعمال قسم التغذية الإكلينيكية، وفيه صيادلة كتير نجحوا في المجال ده وأسسوا أقسام التغذية في مستشفيات كبيرة زي أحمد ماهر التعليمي ومستشفى معهد ناصر وغيرهما.

8. بعض سلاسل الصيدليات خاصة في الخليج استحدثت وظيفة للصيادلة لإعطاء استشارات وعمل توعية للعملاء عن التغذية السليمة والمكملات الغذائية وأنشطة تثقيف عن أمور تخص السمنة والنحافة.

ملاحظة هامة: ما السر الذي يميزك كصيدلي في سوق عمل مجال التغذية المزدحم؟

الحقيقة إن المجال فعلا مزدحم لأن كليات كتير في مصر بتدي مؤهلات في التغذية، والموضوع مش منظم، فممكن تلاقي مزاحمة في التخصص ده من خريجي تربية رياضية واقتصاد منزلي وعلوم قسم تغذية، بل حتى كليات زارعة! بخلاف طب بشري، فإيه الميزة التنافسية اللي عندك كصيدلي لو اعتنيت بيها تتفوق عن كل دول؟

الجواب هو: معرفتك بالدواء! لأن أغلب مشاكل التغذية هتلاقيها بتتقاطع في أوقات كتير مع مرضى بيستخدموا دواء بصورة عارضة أو مرضى أمراض مزمنة ومحتاجين موازنة بين الغذاء والدواء بحيث يحصل تناغم بينهم مش تعارض، وانت هتكون الخبير بالفارماكوثيرابي بتاع الأدوية وإزاي المريض محتاج يزبط الغذاء ونظام حياته علشان تتكامل الخطة العلاجية.

دلوقتي تقدر تتخصص في كل فروع التغذية من خلال باقة واحدة

هتدرس فيها: بورد التغذية الإكلينيكية + منهج شهادة SCOPE + منهج شهادة ISSA
بالإضافة إلى كورس متكامل في التسويق على السوشيال ميديا والبراند الشخصي
مع كورس لاحتراف استخدام الذكاء الصناعي في استشارات التغذية

تفاصيل الباقة في الرابط التالي: اضغط هنا